Verbrauchertelegramm Europa-Ausgabe Ma 2025

Beilage zur ladinischen Europa-Ausgabe Nr. 39 - Redaktion: Europäisches Verbraucherzentrum

IADI

Metede averda ai cosć ascognüs canche i damanëis do n’autorisaziun de iade online

I zitadins y les zitadines dl'UE adora a pert le passaport n'autorisaziun de iade eletronica (ETA) canche ai vá tl Rëgn Uní. L’autorisaziun costa 16 sterlines (zirca 19 euro) y an pó la damané tres l'app aposta dl govern britanich o tres so sit web (https://apply-for-an-eta.homeoffice.gov.uk/apply/electronic-travel-authorisation/how-to-apply). Sce an ó jí ti Stac Unis, tl Canada o tla Nöia Zelanda él ince preodü n'autorisaziun d'entrada eletronica. A pert i sic web di governs ofiziai él sön Internet tröpes agenzies (che pé ofiziales) che pîta da se cruzié da damané do chësta autorisaziun. De regola les ciafon sö insom la lista di resultac canche an chir cun mascins d'inrescida - i sic ofiziai é indere plü injö - y i cosć é de regola ascognüs y cotan plü alc co les tarifes ofiziales. Implü dá inant che che s'anüza de chisc sorvisc dac personai sensibli, sciöche por ejëmpl la fotografia dl passaport y n so retrat, zënza degöna garanzia da ciafé spo veramënter l'autorisaziun.


TÓ JÖ ONLINE

La ZCE aconsiëia da mëte averda ai prighi coliá cun les medejines y i produc cumprá online

Tröc consumadus y tröpes consumadësses á tresfora da sćiampí cun le pëis y podess porchël chirí sön Internet soluziuns asveltes por tó jö. Sön i social él tröpes informaziuns nia dagnora sigödes y datrai cinamai prigoroses. Metede averda ajache la cumpra de integradus alimentars, produc da tó jö o se depuré y medejines online pó comporté prighi sciodi sides por la sanité co por le tacuin. Informaziuns plü menüdes sön l’argomënt é da ciafé sön.
.
IUBILEUM 2025

Indicaziuns por che che vá a Roma

L'ofize de Roma dla Zentrala di Consumadus Europeica Talia á arjigné ca na plata online cun informaziuns por le Iubileum. La plata é ponsada por i pelegrins y les pelegerines y porsones dl'Europa che vá a Roma te chësc tëmp. Ara contëgn detais sön les dates y i evënc prinzipai y d'atres informaziuns interessantes sön d'atri argomënc, sciöche por ejëmpl le trasport, l'alberch, les cumpres, la sanité y la segurëza y tröc consëis d'öga. Les informaziuns é da ciafé por talian y inglesc.

CAJE DL MËIS
N consumadú svedesc â cumpré da d'aisciöda dl 2024 na cherta por na traversada cun la barca dala Talia al'Albania por sües vacanzes d'isté. Püch dan la data dl iade ti â la compagnia de navigaziun taliana lascé alsavëi che al ess messü tó n’atra barca y che baldi n’êl nia ia plü sön chësta barca na cabina dla categoria apostada. Porchël ti êl spo gnü dé na cabina de mëndra categoria. Implü ê la barca piada ia y rovada sön le post le de dl iade cun 4 ores de intardiada. Le consumadú á dé jö na reclamaziun, mo á ma ciafé n voucher de 40 euro sciöche indenisaziun por la mëndra cabina, mo degöna retüda por l'intardiada, che ê stada aladô dla compagnia de navigaziun püch manco co döes ores y porchël ciamó tl limit de toleranza. Chësc ne ti corespognô nia ai fac y porchël é le consumadú jü dala ZCE Svezia, che ti á ortié le caje ala ZCE Talia. Do nosc intervënt á la compagnia de navigaziun azeté da paié le 25% dl prisc dla cherta sciöche compensaziun por la gran intardiada, plü ciamó le 20% dl prisc dla cherta por avëi respognü massa tert ala reclamaziun. Ala fin él gnü retü sot forma de scioldi cinamai le voucher ciafé por la cabina de mëndra categoria.