Verbrauchertelegramm Europa-Ausgabe Messè/Agost 2025

Beilage zur ladinischen Europa-Ausgabe Nr. 55 - Redaktion: Europäisches Verbraucherzentrum

IADI Y VACANZES

La ZCE sostëgn dagnora che che é sön le iade

En ocajiun dl 20ejim aniversar dla Rëi dles Zentrales di Consumadus Europeiches (ECC-Net) renovëia la Zentrala di Consumadus Europeica (ZCE) Talia so impëgn por i viagiadus y les viagiadësses. Da oramai vint agn dëida la rëi ECC-Net tröc zitadins y tröpes zitadines europeics da ciafé na soluziun por i problems liá a cumpres y sorvisc sura i confins fora, ciaran dantadöt di viagiadus y dles viagiadësses che se sposta daite dal marcé unich. Che ara nen vais de problems che reverda i pachec turistics, les sojornanzes, i jori, les barches, la ferata, l’imprëst de auti, la ZCE pîta debann consëis, lëtres model y assistënza. Deplü informaziuns sön i temesc cialc dl isté 2025 é da ciafé sot a: Link.

COMERZ ELETRONICH

Cherta ghela por SHEIN

La Comisciun europeica y les autorités nazionales por la proteziun di consumadus y dles consumadësses (CPC-Network) ti á dan da püch contesté al revenditur online SHEIN na ligna de pratiches sön süa plataforma che violëia le dërt dl'UE en materia de proteziun di consumadus y dles consumadësses: sconti falc, venüdes sot a presciun, informaziuns che mancia, falades y che ingiana sön i dërc legai di consumadus y dles consumadësses, etichëtes de produc cun informaziuns che ingiana, detlaraziuns de sostignibilité che ingiana y dac de contat ascognüs. Al ti speta sëgn al’aziënda da respogne ales conclujiuns dla rëi CPC sön co ti ester manëcia ai problems ciafá fora. Sce SHEIN n'ess nia da respogne a na moda adatada, risćera da gní straufada. Deplü informaziuns ciafëise chiló.

COMERZ ELETRONICH

Shopping sön TikTok?

Ti ultimi agn s'á le comerz eletronich daldöt mudé. An ne cumpra nia plü ma da sic tradizionai o marketplaces strotorai: tres plü gonot vëgn i consumadus y les consumadësses baiá sö da cumpré diretamënter daite dales plataformes social, olache i confins danter reclam, contignü y venüda é tres manco tlers y nia sauris da ciafé sö. Da canche al é tla Talia TikTok Shop vëgnel tres plü gonot cumpré diretamënter da n video o na direta social. Mo ci che pé comot y da rí pó ascogne ince prighi desvalis por i consumadus y les consumadësses, dantadöt sce an cumpra produc da venditurs nia conesciüs o nia de crëta. Nia döt ci che vëgn presenté sön i social n’é sigü, legal o conform ales normatives europeiches. Le fat che an pois atira cumpré cun “n swipe” ne dess nia fá desmentié l’importanza da controlé dagnora l’identité dl venditur y les condiziuns de venüda. Por deplü informaziuns sön l’argomënt.

CAJE DL MËIS
N consumadú belgich â aposté na ciamena a Aunejia. La pröma sëra ál albü na burta sorpresa da jí a dormí: le madroz y i linzos ê plëgns de antlüsc da let. Le consumadú é atira jü dala reception por segnalé ci che al ê sozedü, mo ara n'é nia jöda da ti dé n'atra ciamena. Al n'á podü fá nia ater co se chirí n'atra ciamena inzai d'ater. Le hotel ti â impormetü da ti rete i scioldi, mo ajache al ne ti â do da mëisc y tröpes e-mails tres ciamó nia retü i scioldi, á le consumadú damané aiüt ala Zentrala di Consumadus Europeica Belgio che á ortié inant la pratica ala Zentrala di Consumadus Europeica Talia. Chësta é stada buna, por la ligrëza dl consumadú, da fá a na moda che le hotel ti retess finalmënter i scioldi.